Iqaluit, Nunavut (December 4, 2025) - Nunavunmi Igluliqijirjuatkut (NHC) quviahuktun unniutijaami angiklijuummiqtirnianik uuminga Canada–Nunavut Iglutigut Ikajuutikhamik (CNHB), tuniudjutipluni angitqijaujunik ihumagittiaqhimajuniklu ikajuutikhanik Nunavunmiunnun.

Hivuliqpaakkut, NHCkut tunihiniaqtut $600 tatqikhiutini ($7,200 ukiuq tamaat) Iglunik Nanminiqaqtunun Ikajuutikkut, tunihijut taapkununga, taaksiijautiqangittunik manikkut ikajuutinik pijaaqtunun Nunavunmiunun ikajuutikhat akituvalaarnikkut akiinni nanminiqarnikkut igluqarnirnun. Taima $6 million maniliqtuutinik hailihimajun talvunga 2028mun, ikahuqhugin ilagiiktun munaridjutikkut nanminiqarnikkut-pidjutilgit akiliqtakhat najuriamingnilu ihumaalungnaittumik iglumingni.

“Una angikliharjuummirniq tautuktittuq havagumadjutiptingnik pipkainirnun Nunavunmiunnun iglukhaqaqtipkainirnun,” uqaqtuq Maligaliuqti Cecile Nelvana Lyall, Minista munarijuq Nunavunmi Igluliqijirjuatkunnun. “Uvuuna nutaani ikajuutikhami, kiudjutigijavun aallangajun piqpiarutiit uvani iglunik nanminiqarnirnun Nunavunmi, ikiklihaqhugin ajurnarutit inunungni iglukhainni, ikajuqhugillu ilagiiktun najuqhimmaarumajait iglumingnik.”

“Kanadaup Kavamanga quviahuktuq paannariiqatigijaami ukuat Nunavunmi Igluliqijirjuatkut tunijaami ajurnaittunik kiudjagiktuniklu ikajuutikhanik angumadjutijun aallangajun iglukhatigun ajurnavjaktun Nunavunmi, “uqaqtuq Maligaliuqti Gregor Robertson, Minista Igluliqinirnun Aulapkaidjutikhanullu Ministaujuqlu uvani Pacific Economic Development Canadami. “Havagumajugun tuninirnun qajangnaittunik, akituvallaangungittunik iglukhanik tamainnun Nunanmi nanminirijakhamingnik.”

Pijaarniq tunnganiqaqtuq iglumiujuni manilirutainni. Uuktuqtut nanminiqaqtukhat iglumingni iglugilluaqtamingnik pingittullu uuminga Nunavut Kavamanganin Havaktini Iglukkut ikajuutimik.

Uuktuutit uuvnga CNHB Iglunik Nanminiqaqtunun Ikajuutikkut hailihimaniaqtun talvuuna Nunavunmi Igluliqijirjuatkut qaritaujakkuurutaani uvani https://www.nunavuthousing.ca/programs/canada-nunavut-housing-benefit hivjaqluguluunniit 1-844-413-9355. Pinikkut havaktiit ikajurniaqtait uuktuqtut havagutikkut naunaijarnirnun pijaaqtaarnirnun pipkainirnullu qilamik pinirnun ikajuutikhanun.

Una angilijuummiqtiqhimajuq Kanada-Nunavut Iglunik Nanminiqaqtunun Ikajuutikkut akiitigun-aajjukkuhiuqhimajuq Nunavunmi Igluliqijirjuatkunnin Kanadaup Kavamanganillu talvuuna Kanadami Piqutini Akiliqtuidjutini uvanilu Igluliqinirnun Kuapuriisitkunnin aulaniaqtuqlu talvunga 2028mun.