ᐃᖃᓗᐃᑦ, ᓄᓇᕗᑦ (ᔫᓂ 16, 2025)– ᔫᓂ 9−ᒥᑦ 12−ᒧᑦ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᑲᔪᓯᑎᑦᑎᓚᐅᖅᐳᑦ 2025−ᒥ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑲᑎᒪᓂᕆᔭᖓᓂᒃ ᐃᖃᓗᖕᓂ, ᑲᑎᑎᑦᑎᓪᓗᑎᒃ 300 ᐅᖓᑖᓃᑦᑐᓂᒃ ᓯᕗᓕᖅᑎᓂᒃ ᐃᖅᑲᓇᐃᔭᕐᕕᒋᔭᐅᔪᓂᑦ, ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᓇᐅᒃᑯᓕᒫᕐᓗ ᒐᕙᒪᒃᑯᓐᓂᑦ. ᐅᓪᓗᓄᑦ−ᑎᓴᒪᓄᑦ ᖃᓄᐃᓕᐅᒐᒃᓴᖅ ᐋᖅᑭᒃᓯᓪᓗᓂ ᓄᑖᒥᒃ ᐊᑐᖅᑕᐅᓂᐊᖅᑐᒥᒃ ᐱᓕᕆᖃᑎᒌᒃᓗᑎᒃ ᖃᓄᐃᓕᐅᕆᐊᕐᓂᕐᒥᒃ ᐃᒡᓗᓕᐅᖃᑎᒌᖕᓂᖅ, ᖃᐅᔨᒪᔭᐅᖕᒥᔪᖅ ᓄᓇᕗᒻᒥ 3000 ᖃᓄᐃᓕᐅᕈᑕᐅᔪᒪᔪᑦ ᐃᒡᓗᓕᐅᕐᓂᐊᕐᓗᓂ 3,000-ᓂᒃ ᓄᑖᓂᒃ ᐃᒡᓗᓂᒃ 2030 ᑐᖔᓂ, ᐱᓕᕆᐊᖑᕙᓪᓕᐊᔪᒪᔪᖅ ᐋᖅᑭᒃᑕᐅᓯᒪᔪᖅ 6-ᖓᓂ ᒪᓕᒐᓕᐅᕐᕕᖕᒥ ᑲᑐᔾᔨᓗᑕ ᐱᓕᕆᐊᒃᓴᑦ.

ᐃᓚᐅᔪᑦ ᕿᒥᕐᕈᓚᐅᖅᐳᑦ ᐊᔾᔨᒌᙱᑦᑐᓂᒃ ᐃᒡᓗᓕᕆᓂᕐᒧᑦ ᐱᔾᔪᑕᐅᔪᓂᒃ ᑕᑯᒃᓴᐅᑎᑦᑎᔪᓂᒃ ᐅᑭᐅᖅᑕᖅᑐᒥ ᓇᖕᒥᓂᖃᕐᕕᐅᔪᓂᒃ, ᐃᓕᓴᐃᔨᓂᒃ, ᐊᑐᐊᒐᓕᐅᖅᑎᓂᒃ ᐊᒻᒪ ᓄᓇᓕᖕᓂ ᓯᕗᓕᖅᑎᓂᒃ. ᐅᑯᐊ ᐅᖃᐅᓯᐅᓗᐊᖅᓯᒪᔪᑦ ᓂᐅᕕᖃᑦᑕᕐᓂᕐᒧᑦ ᐊᒻᒪ ᓄᓇᒥᒃ ᐱᕙᓪᓕᐊᑎᑦᑎᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒃᑐᐃᔾᔪᑕᐅᓲᑦ ᐃᒡᓗᑭᒃᓴᕐᓂᕐᒧᑦ, ᑮᓇᐅᔭᖃᖅᑎᑕᐅᓂᕐᒧᑦ, ᐊᒻᒪ ᐱᕕᒃᓴᐅᔪᓐᓇᖅᑐᓂᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᓄᓇᕗᒥᐅᓄᑦ ᓄᓇᓕᖕᓂ ᐃᓕᓐᓂᐊᖅᑎᑦᑎᓂᒃᑯᑦ. ᑖᓐᓇ ᑲᑎᒪᓂᖅ ᑲᑎᑎᑦᑎᓚᐅᖅᐳᖅ ᐱᖃᖃᑕᐅᔪᓂᒃ ᓇᓗᓇᐃᖅᓯᔪᒪᓪᓗᑎᒃ ᐊᑐᖅᑕᐅᔪᓐᓇᖅᑐᓂᒃ ᖃᓄᖅ ᐊᖏᑎᒋᔪᒥᒃ ᐃᒡᓗᖃᖅᑎᑦᑎᕙᖕᓂᖅ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ. ᑲᑎᓐᓂᐅᔪᑦ ᐊᒻᒪᓗ ᐃᓱᒪᒋᔭᐅᓯᒪᔪᑦ ᑕᐅᕐᓰᔾᔪᑕᐅᓯᒪᔪᑦ ᐱᓇᓱᐊᕈᓯᓕᒫᒥᑦ ᐃᑲᔫᑎᖃᕐᓂᐊᖅᑐᑦ ᐊᑯᓂᒧᑦ ᑲᔪᓯᑦᑎᐊᕐᓂᖓᓄᑦ ᓄᓇᕗᑦ 3000.

ᓄᑖᑦ ᐃᒡᓗᓕᕆᓂᕐᒧᑦ ᐱᓕᕆᖃᑎᒌᖕᓃᑦ ᐅᖃᐅᓯᐅᔪᑦ

ᑲᑎᒪᓂᖅ ᐃᓚᖃᓚᐅᖅᐳᖅ ᐊᑎᓕᐅᖅᑕᐅᓂᖏᓐᓂᒃ ᒪᕐᕉᒃ ᐃᒡᓗᓕᐅᕐᓂᕐᒧᑦ ᑳᓐᑐᓛᒃ ᑕᑯᒃᓴᐅᑎᑦᑎᔪᑦ ᖃᓄᖅ ᐃᓄᐃᑦ, ᐃᓛᒃᑰᖅᑐᑦ ᐊᒻᒪ ᐃᓄᖕᓄᑦ ᐊᐅᓚᑕᐅᔪᑦ ᑲᑐᔾᔨᖃᑎᒌᑦ ᓇᓕᒧᒌᒃᑎᑦᑎᖕᒪᖔᑕ ᐱᐅᓯᒋᐊᕈᑎᒃᓴᓂᒃ ᐃᒡᓗᓕᕆᓂᕐᒧᑦ ᓴᖅᑭᑉᐸᓪᓕᐊᔪᓄᑦ ᓄᓇᕗᒻᒥ.

ᐊᐃᑉᐹᖑᑎᓪᓗᒍ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑎᓕᐅᓚᐅᖅᐳᑦ ᐊᖏᖃᑎᒌᒍᑎᒥᒃ Birchliff Development Limited−ᑯᓐᓂ, ᐊᑕᖐᔪᒥᒃ ᐱᔨᑦᑎᕋᕐᓂᕐᒧᑦ ᑕᐅᑦᑐᒃᓴᖓᓂᒃ ᐊᒻᒪ ᐃᒡᓗᓕᐅᖅᑎᓂᒃ ᑲᒪᒋᔭᖃᓪᓗᐊᑕᖅᖢᑎᒃ ᐅᑭᐅᖅᑕᖅᑐᒥ ᐃᒡᓗᓕᕆᓂᕐᒧᑦ. ᑖᓐᓇ ᐱᓕᕆᖃᑎᒌᖕᓂᖅ ᐃᑲᔪᖅᑐᐃᓂᐊᖅᐳᖅ ᓴᖅᑭᑎᑦᑎᖃᑎᒌᖕᓂᕐᒥᒃ ᐃᓄᐃᑦ−ᑐᕌᖓᑎᑕᐅᔪᓂᒃ ᐃᒡᓗᖃᖅᑎᑦᑎᕙᖕᓂᕐᒧᑦ ᐋᖅᑭᒃᓯᒪᓕᕈᑕᐅᔪᓐᓇᖅᑐᓂᒃ ᐊᒃᑐᐊᓂᖃᖅᑐᓂᒃ ᓄᓇᓕᖕᓂ ᐱᔭᐅᔭᕆᐊᓕᖕᓄᑦ, ᐊᓐᓂᕆᔭᐅᔪᓄᑦ ᐊᔪᙱᓐᓂᕆᔭᐅᔪᓄᓪᓗ. ᐱᖓᑦᓯᕐᒥᑦ, ᓄᓇᕗᒻᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᓴᖅᑎᑦᑎᓚᐅᖅᑐᑦ ᐱᓕᕆᖃᑎᖏᓐᓂᑦ ᐅᑭᐅᖅᑕᖅᑐᒥᑦ ᓂᕿᑦᑎᐊᕙᖕᓄᑦ ᐱᓕᕆᐊᓂᑦ, ᓄᓇᕗᒻᒥᑦ ᐃᓄᖕᓄᑦ−ᑐᕌᖓᔪᑦ ᐃᓄᖕᓄᑦ, ᐅᐃᒍᐃᓂᖕᒥᑦ ᓄᓇᓕᖕᓂᑦ−ᐊᐅᓚᑕᐅᔪᓂᑦ ᐃᒡᓗᓕᕆᓂᖕᓂᑦ ᕿᑭᖅᑕᓂᑦ, ᐃᓚᓕᐅᔾᔨᓯᒪᓗᑎᒃ ᐃᑲᔪᖅᑐᐃᓂᖕᓂᑦ ᐱᒋᐊᖅᑕᓂᑦ ᑐᕌᖓᔪᑦ ᓄᓇᓕᖕᓂᑦ ᐃᖅᑲᓇᐃᔭᖕᓂᖕᓂᑦ.

"ᑖᒃᑯᐊ ᐊᖏᕈᑏᑦ ᓇᓗᓇᐃᖅᓯᕗᑦ ᓄᓇᓕᖕᓂ ᐋᖅᑭᒃᑕᐅᓯᒪᔪᑦ, ᑲᔪᓯᑎᑕᐅᔪᓐᓇᖅᑐᑦ ᐃᒡᓗᐃᑦ ᐊᐅᓚᑕᐅᔪᓐᓇᕐᓂᖏᓐᓂᒃ ᐊᒻᒪ ᑲᔪᓯᑎᑕᐅᔪᓐᓇᕐᓗᑎᒃ ᓄᓇᑦᑎᓐᓂ," ᐅᖃᓚᐅᖅᐳᖅ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᑕᑯᕙᓪᓕᐊᔪᒍᑦ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ ᐱᓕᕆᖃᑎᒋᔭᑦᑎᓐᓂ ᐱᕈᖅᐸᓪᓕᐊᖏᓐᓇᖅᑐᓂᒃ, ᐊᑐᓂ ᐊᒥᖅᑳᕈᑎᖃᖅᑐᑦ ᐊᔾᔨᒌᓂᒃ ᐱᔪᒪᓂᕐᓂ ᐱᓕᕆᐊᕆᓗᒍ ᓄᓇᕘᑉ ᐃᒡᓗᑭᒃᓴᕐᓂᖅ. ᖁᔭᓐᓇᒦᕈᒪᔭᒃᑲ ᐃᓐᓇᐃᑦ, ᒪᒃᑯᒃᑐᑦ, ᖃᐅᔨᒪᔨᑕᒻᒪᕇᑦ, ᐊᒻᒪ ᓯᕗᓕᖅᑏᑦ ᐃᓚᐅᓚᐅᖅᑐᑦ ᑕᒪᑐᒪᓂ ᑲᑎᒪᓂᕐᒥ. ᐃᑲᔫᑎᖏᑦ ᐃᑲᔫᑕᐅᓂᐊᖅᐳᑦ ᓯᕗᓂᒃᓴᖓᓄᑦ ᐃᒡᓗᓕᕆᓂᕐᒧᑦ ᓄᓇᕘᓕᒫᒥ."

ᓱᓕᔪᑦ:

•ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑲᑎᒪᑎᑦᑎᓚᐅᖅᐳᑦ 25 ᐅᖓᑖᓂ, ᐅᖃᐅᓯᐅᓪᓗᐊᑕᖅᑐᓂᒃ, ᐊᕕᒃᑐᐃᓪᓗᑎᒃ ᑲᑎᒪᑎᑦᑎᓪᓗᑎᒃ ᐊᒻᒪ ᖁᙱᐊᖅᑕᐅᓪᓗᑎᒃ ᑕᑯᒃᓴᐅᑎᑦᑎᓪᓗᑎᒃ ᐅᑭᐅᖅᑕᖅᑐᒥ ᓄᑖᓂᒃ ᓴᖅᑭᑕᐅᔪᓂᒃ ᐊᒻᒪ ᐱᕙᓪᓕᐊᓂᕆᔭᐅᔪᓂᒃ.

•ᒪᕐᕉᒃ ᐃᒡᓗᓕᐅᕐᓂᕐᒧᑦ ᑳᓐᑐᓛᒃ ᐊᑎᓕᐅᖅᑕᐅᓯᒪᔫᒃ Birchcliff Development ᐊᒻᒪ ᐅᑭᐅᖅᑕᖅᑐᒥ ᓂᕿᑦᑎᐊᕙᓕᕆᓂᕐᒧᑦ ᐱᓕᕆᐊᓄᑦ ᐱᐅᓯᒋᐊᕈᑎᒃᓴᑦ ᓄᓇᓕᖕᓂ ᐊᐅᓚᑕᐅᔪᓂᒃ ᐃᒡᓗᓂᒃ.

•ᓄᓇᕗᑦ 3000 ᐊᖑᒻᒪᑎᕗᖅ ᐊᖑᒻᒪᑎᔪᒪᓂᕐᒧᑦ ᑐᕌᕆᔭᐅᔪᒧᑦ 1,000-ᓄᑦ ᐊᖏᕐᕋᕆᔭᐅᓂᐊᓕᖅᑐᓄᑦ ᐱᓕᕆᐊᖑᓪᓗᓂ ᐅᑐᐱᕆ 2025 ᑎᑭᓯᒪᓕᖅᐸᑦ, ᐋᖅᑭᒃᑕᐅᓯᒪᔪᑎᑐᑦ 6−ᒋᔭᖓᓂᑦ ᒪᓕᒐᓕᐅᕐᕕᖕᒥ ᓄᓇᕗᒻᒥ, ᓇᓗᓇᐃᖅᓯᓪᓗᑎᒃ ᐃᒡᓗᖃᖅᑎᑦᑎᓂᕐᒥᒃ ᓯᕗᓪᓕᖅᐸᐅᔾᔭᐅᓯᒪᓂᖓᓂᒃ ᐅᑯᑎᒎᓇᖅ ᑲᑐᔾᔨᓗᑕ ᐱᓕᕆᐊᒃᓴᑦ.

•ᑎᑎᕋᕐᕕᖓ ᐃᒡᓗᕐᔪᐊᓕᕆᔨᒃᑯᑦ (OCBO) ᐅᓂᒃᑳᓕᐅᓲᖑᕗᑦ 855-ᓂᒃ ᐃᒡᓗᓂᒃ ᒫᓐᓇᒧᑦ ᑎᑭᖦᖢᒍ (347 ᐱᐊᓂᒃᑕᐅᓯᒪᓕᖅᑐᑦ, 508-ᖑᓪᓗᑎᒃ ᓴᓇᔭᐅᔪᑦ ᐊᒻᒪ ᐋᖅᑭᒃᓯᒪᓂᒃᓴᖏᑦ).

•200−ᐸᓗᖕᓂᑦ ᐃᒡᓗᒃᓴᒃᑲᓐᓂᕐᓂᒃ ᓂᕆᐅᒋᔭᐅᔪᖃᖅᐳᖅ ᓴᓇᔭᐅᓯᒋᐊᓛᕋᓱᒋᔭᐅᓪᓗᓂ 2025 ᐃᓱᐊᓄᑦ ᑎᑭᓪᓗᒍ.

•5 ᐊᒻᒪᓗ ᐊᕝᕙᖓ ᐊᕐᕌᒍᐃᑦ ᐱᔭᕇᖅᑕᐅᓇᓱᐊᖅᑎᓪᓗᒍ ᓄᓇᕗᑦ 3000 ᐸᕐᓇᒍᑎ.