ᐃᖃᓗᐃᑦ, ᓄᓇᕗᑦ (ᐊᐃᕆᓕ 10, 2025) − ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖁᕕᐊᓱᒃᐳᑦ ᖁᕕᐊᓲᑎᖃᕈᓐᓇᕐᒪᑕ ᐱᐊᓂᒃᑕᐅᔪᓂᒃ ᐃᒡᓗᓂᒃ ᐊᕙᑎᓪᓗ ᑎᓴᒪᓂᒃ ᓄᑖᓂᒃ ᐊᑭᑐᓗᐊᙱᑦᑐᓂᒃ ᐃᒡᓗᓂᒃ ᐃᖃᓗᐃᑦ ᓯᒡᔭᖓᓂ. ᑖᓐᓇ ᐊᑭᑐᓗᐊᙱᑦᑐᒥᒃ ᐃᓪᓗᖁᑎᒋᔭᐅᔪᓂᒃ ᐱᓕᕆᐊᖑᔪᖅ, ᑮᓇᐅᔭᓕᐅᕈᑕᐅᔪᑦ $12.8 ᒥᓕᐊᓂᒃ, ᓴᖅᑭᑎᑦᑎᕗᑦ ᑎᓴᒪᓂᒃ ᐊᕐᕕᓂᓕᖕᓂᒃ ᑲᑎᙵᔪᓂᒃ ᐊᕙᑎᓪᓗ ᑎᓴᒪᓂᒃ ᓄᑖᓂᒃ ᐃᓪᓗᓂᒃ, ᐱᖃᓯᐅᑎᓪᓗᒋᑦ ᑎᓴᒪᑦ ᐊᑕᐅᓯᕐᒥᒃ ᐃᓪᓗᕈᓯᓖᑦ ᐊᕙᑎᓪᓗ ᒪᕐᕉᖕᓂᒃ ᐃᓪᓗᕈᓯᓕᑦ.

"ᑖᓐᓇ ᐱᓕᕆᐊᒃᓴᖅ ᐆᒃᑑᑎᑦᑎᐊᕙᐅᕗᖅ ᐱᓇᔪᒃᑕᑦᑎᓐᓂ ᐅᓄᖅᓯᕙᓪᓕᐊᔪᒻᒪᕆᖕᒥᑦ ᓄᓇᕗᒻᒥ ᐊᔾᔨᒌᙱᑦᑐᓂᑦ ᐃᒡᓗᒃᓴᕆᔭᐅᔪᓂᑦ ᐃᒡᓗᓕᐅᖃᑎᒌᖕᓂᒃᑯᑦ," ᐅᖃᖅᑐᖅ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᑖᒃᑯᐊ ᐊᕙᑎᓪᓗ ᑎᓴᒪᐃᑦ ᓄᑖᑦ ᐃᒡᓗᐃᑦ ᐊᖏᕐᕋᕆᔭᐅᓕᕐᓂᐊᖅᑐᑦ ᐃᓚᒌᓄᑦ ᐃᖃᓗᖕᓂ, ᐃᖅᑲᓇᐃᔭᕈᒪᔪᓄᑦ, ᐃᓅᓗᑎᒃ ᐊᒻᒪ ᐃᓚᒥᓂᒃ ᐱᕈᖅᓴᐃᓗᑎᒃ."

ᐃᒡᓗᐃᑦ ᓴᓇᔭᐅᓚᐅᖅᑐᑦ ᐴᑦᑭᓕᕝᑯᑦ ᐱᕙᓪᓕᐊᑎᑦᑎᔨᓂᑦ ᐊᑭᖃᕋᔪᒃᖢᑎᒃ $535,000 ᐃᒡᓗ ᐊᑕᐅᓯᖅ ᐅᕝᕙᓘᓐᓃᑦ $585 ᑭᑉᐹᕆᒃᑐᖅ ᐃᓯᒐᒃ ᐊᑕᐅᓯᖅ.

"ᐃᒡᓗᓕᐅᖅᐸᓪᓕᐊᓂᖅ ᐅᑭᐅᖅᑕᖅᑐᒥ ᐊᒃᓱᕈᕐᓇᖅᑐᒻᒪᕆᐊᓘᔪᓐᓇᖅᑐᖅ," ᐅᖃᓚᐅᖅᐳᖅ ᐃᐅᕆᓐ ᑎᕗᕉ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨᓪᓗᐊᑕᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. "ᐊᓕᐊᓇᐃᒍᓱᒻᒪᕆᒃᐳᒍᑦ ᑕᒪᑐᒥᖓ ᐱᓕᕆᐊᒥᑦ, ᓴᖅᑭᔮᖅᑎᑦᑎᔪᖅ ᓱᒃᑲᒃᑎᒋᐊᖅᑎᑦᑎᓪᓗᑕ ᐃᒡᓗᒃᓴᓂᑦ ᓴᓇᔭᐅᔪᑦ ᐊᑭᑐᓗᐊᙱᖦᖢᑎᒃ ᓈᒻᒪᒃᓗᑎᒡᓗ − ᑕᒪᑐᒧᖓ, ᑕᖅᑭᑦ 12 ᑐᖔᓂᑦ ᐱᒋᐊᕐᓂᖓᓂᑦ ᐃᓱᐊᓄᑦ."

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᓇᖕᒥᓂᖃᕐᓂᐊᖅᐳᑦ ᐊᐅᓚᑦᑎᓗᑎᒡᓗ ᐃᒡᓗᕐᔪᐊᓂᑦ ᐃᓚᒋᔭᐅᓗᓂ ᑕᒪᐃᓐᓄᑦ ᐃᒡᓗᓕᕆᓂᕐᒧᑦ ᐱᓕᕆᐊᖏᓐᓄᑦ. ᑖᒃᑯᐊ ᐃᒡᓗᐃᑦ ᓴᓂᕐᕙᒃᑕᐅᓂᐊᖅᑐᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᒡᓗᖁᑎᒋᔭᐅᓪᓗᐊᑕᕐᓗᑎᒃ, ᐃᓇᖏᖅᑕᐅᓗᑎᒃ ᐃᒡᓗᐃᑦ ᐃᑭᓚᐅᖅᑐᑦ 1088-ᒥ ᓅᐳᓪ ᐃᒡᓗᐊᓗᒃ ᔮᓄᐊᕆᐅᑎᓪᓗᒍ ᑕᒪᑐᒪᓂ ᐊᕐᕌᒍᒥ.