ᐃᖃᓗᐃᑦ, ᓄᓇᕗᑦ (ᒪᐃ 26, 2025) − ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ (NHC) ᓇᓗᓇᐃᖅᓯᒃᑲᓐᓂᖅᐳᑦ ᐊᖏᕈᑎᒋᓯᒪᔭᒥᓂᒃ ᐱᐅᓯᒋᐊᖅᑎᑦᓯᔪᒪᓪᓗᑎᒃ ᐃᓪᓗᓕᕆᓂᕐᒧᑦ ᐱᔨᑦᓯᕋᐅᑎᓂᒃ ᐊᖏᓪᓕᒋᐊᕆᓂᕐᒧᓪᓗ ᐊᑐᐃᓐᓇᐅᔪᓂᑦ ᐃᓪᓗᐃᑦ ᓄᓇᕗᒥᐅᓄᑦ ᐱᓕᕆᔾᔪᓯᖅ ᖃᐅᔨᓴᖅᑕᐅᕋᑖᓚᐅᖅᑎᓪᓗᒍ.

ᑮᓇᐅᔭᓂᒃ ᖃᐅᔨᒪᖅᑎᒻᒪᕆ ᑲᓇᑕᒥ ᐊᓪᓚᕝᕕᐊ (OAG) ᑲᒪᒋᔭᖃᓚᐅᖅᐳᖅ ᐱᓕᕆᐊᖏᓐᓂᒃ ᖃᐅᔨᓴᕐᓂᕐᒧᑦ 2024−ᒥ ᖃᐅᔨᓴᖅᓱᓂ ᖃᓄᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᐅᓚᑦᓯᓚᐅᕐᒪᖔᑦ ᐃᓪᓗᓕᕆᓂᕐᒧᑦ ᐱᔨᑦᓯᕋᐅᑎᓂᒃ ᐊᒻᒪᓗ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᓈᓴᖅᑕᐅᔪᓂᒃ ᐄᐳᓗᒥ 2022−ᒥ ᐊᒻᒪᓗ ᑏᓯᒻᕙ 2024−ᒥ.

ᐅᓂᒃᑳᖅ ᖁᓕᓂᒃ ᐊᑐᓕᖁᔨᔾᔪᑎᓕᒃ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᓯᕗᒻᒧᐊᑉᐸᓪᓕᐊᓂᕐᒧᑦ. ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᑭᐅᓯᒪᓕᖅᑐᑦ ᖃᐅᔨᔭᐅᔪᓄᑦ ᐊᑐᓕᖁᔭᐅᔪᓄᓪᓗ ᐅᓂᒃᑳᕐᒥ ᐅᑯᓂᖓ ᐱᓕᕆᐊᑦᓴᓂᒃ ᑐᑦᓯᕋᖅᓱᑎᒃ:

• ᕿᒥᕐᕈᒃᑲᓐᓂᕐᓗᒋᑦ ᓇᓴᐃᔾᔪᑕᐅᓪᓗᐊᑕᖅᑐᑦ ᐊᑐᖅᑕᐅᔪᑦ ᓯᕗᓪᓕᖅᐸᐅᔾᔭᐅᒋᐊᓖᑦ ᑲᒪᒋᔭᐅᑎᓪᓗᒋᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᓴᓂᕐᕙᐃᓂᕐᒧᑦ ᐱᐅᓯᒋᐊᖅᑎᑦᓯᓂᕐᒧᓪᓗ ᐊᑐᖅᑕᐅᕙᑦᑐᒥᒃ ᑲᔪᓯᓂᕆᔭᐅᕙᑦᑐᒥᓪᓗ ᓇᓃᑎᑕᐅᓂᖏᓐᓄᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᐃᓪᓗᑖᕋᓱᐊᕈᑏᑦ.

• ᐃᑲᔪᖅᑐᐃᓂᖅᓴᐅᓂᕐᒧᑦ ᑲᒪᒋᔭᐅᓗᑎᓪᓗ ᓄᓇᓕᓐᓂ ᐃᓪᓗᓕᕆᔨᒃᑯᑦ (LHO) ᓴᓂᕐᕙᐃᖃᑦᑕᕐᓂᖏᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᑦ ᑖᒃᑯᐊ ᒪᓕᑦᓯᐊᖁᓪᓗᒋᑦ ᒐᕙᒪᒃᑯᑦ ᒪᓕᒐᖏᓐᓂᑦ, ᐊᑐᐊᒐᖏᓐᓂᑦ, ᐱᓕᕆᔾᔪᓯᖏᓐᓂᑦ ᐊᐅᓚᑦᓯᓂᕐᒧᓪᓗ ᐊᖏᕈᑎᓂᑦ ᑖᒃᑯᖕᓇᙵᑦ ᓄᓇᓕᓐᓂ ᐃᓪᓗᓕᕆᔨᒃᑯᓐᓂᑦ ᓄᓇᕗᒻᒥᓪᓗ ᐃᓪᓗᓕᕆᔨᕐᔪᐊᒃᑯᓐᓂᑦ.

• ᐋᖅᑭᓪᓗᒋᑦ ᖃᐅᔨᒪᔾᔪᑎᑦᓴᐃᑦ ᓄᓇᓕᓐᓂ ᐃᓪᓗᓕᕆᔨᒋᔭᐅᔪᓄᑦ ᐊᑐᖅᑕᐅᖃᑦᑕᕐᓂᐊᖅᑐᑦ ᓇᓕᒧᒌᒃᑎᑦᓯᓂᕐᒧᑦ ᓅᑦᑐᒪᔪᓂᑦ ᑐᑦᓯᕋᐅᑎᓄᑦ ᐱᑕᖃᖅᐸᒌᖅᑐᓂᒃ ᐊᑐᖅᑐᐊᖅᑎᓂᑦ ᓄᑖᓄᑦ ᐊᑐᖅᑐᐊᖅᑎᓂᑦ ᐱᓇᓱᐊᕈᑕᐅᔪᓄᑦ ᐱᐅᓯᒋᐊᖅᑎᑦᓯᔪᒪᓂᕐᒧᑦ ᐊᔾᔨᒌᒃᑎᑦᓯᓂᕐᒧᑦ ᓴᓂᕐᕙᒃᑕᐅᕙᑦᑐᓂᒃ ᐃᓪᓗᓂᑦ.

• ᐊᑐᓕᖅᑎᑦᓯᓗᑎᒃ ᐊᔾᔨᒌᓕᖅᑎᑕᐅᓯᒪᔪᒥᒃ ᐊᑐᖅᑕᐅᓇᔭᖅᑐᒥᒃ ᑲᑎᖅᓱᐃᓂᐊᕐᓗᓂ, ᐊᐅᓚᑦᓯᓂᐊᕐᓗᓂ ᖃᐅᔨᓴᖅᓯᓂᐊᕐᓗᓂᓗ ᐅᑕᖅᑭᔪᓂᒃ ᑎᑎᕋᖅᓯᒪᔪᓂᒃ ᓄᓇᓕᓕᒫᓂ ᓇᓗᓇᐃᖅᓯᓂᕐᒧᑦ ᐊᔾᔨᒌᒃᑎᑦᓯᓂᕐᒥᒃ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂ ᓴᓂᕐᕙᐃᕝᕕᐅᓂᕐᒥᒃ ᑐᓴᐅᒪᑎᑦᓯᔪᒪᓂᕐᒧᓪᓗ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂ ᐱᕙᓪᓕᐊᓂᕆᔭᐅᔪᒥᒃ.

• ᖃᐅᔨᓴᖅᑎᑦᓯᓗᑎᒃ ᐃᓄᑐᖃᐃᑦ ᐃᓄᐃᓪᓗ ᑎᒥᒥᒍᑦ ᐊᔪᕈᑎᓖᑦ, ᐅᑯᓂᖓᓗ ᐊᑐᖅᑐᐊᖅᑎᐅᔪᑦ, ᐅᑕᖅᑭᔪᑦ ᐱᓇᓱᐊᖅᑐᑦ ᓄᑖᓪᓗ ᐱᓇᓱᐊᖅᑐᑦ, ᓇᓗᓇᐃᕐᓗᒋᑦ ᐃᓪᓗᓕᒫᑦ ᐊᑐᖅᑕᐅᔪᓐᓇᖅᑐᑦ, ᐱᐅᓯᕚᓪᓕᖅᑎᓪᓗᒋᑦ ᓴᓂᕐᕙᐃᓂᕐᒧᑦ ᑖᒃᑯᓂᖓ ᐃᓪᓗᓂᒃ ᐱᐅᓯᒋᐊᖅᑎᓪᓗᒋᓪᓗ ᐱᓕᕆᐊᖑᔪᓐᓇᖅᑐᑦ ᐊᕝᕕᐊᕈᑎᖃᖏᑦᑐᓄᓪᓗ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓄᑦ ᓴᓂᕐᕙᒃᑕᐅᔪᓂᑦ.

• ᑎᑎᕋᖅᐸᓪᓕᐊᓗᒋᑦ ᑕᑯᒃᓴᐅᔪᓕᒫᑦ ᐊᕝᕕᐊᕈᑕᐅᖏᑦᑐᓂᓪᓗ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᓈᓴᖅᑕᐅᓯᒪᔪᑦ ᐃᑲᔪᖅᑐᐃᓂᕐᒧᑦ ᐊᔾᔨᒌᒃᑎᑦᓯᔪᓂᒃ ᓴᓂᕐᕙᒃᑕᐅᔪᓂᒃ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᑖᒃᑯᐊ ᐅᔾᔨᕐᓇᖅᑎᓪᓗᒋᑦ.

• ᐱᐅᓯᒋᐊᕐᓗᒋᑦ ᐊᐅᓚᑦᓯᔾᔪᓰᑦ ᖃᐅᔨᓴᖅᑕᐅᔪᓪᓗ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᑐᑭᓯᒋᐊᕋᑦᓴᑦᓯᐊᕙᒃᑯᑦ ᐊᐅᓚᑦᓯᓂᕐᒧᑦ, ᐃᓚᓕᐅᑎᓗᒋᑦ ᑲᑎᖅᓱᖅᓯᒪᔪᑦ ᐃᓚᓕᐅᔾᔨᔪᓪᓗ ᐃᓪᓗᓕᕆᓂᕐᒧᑦ ᑎᑎᕋᖅᓯᒪᔪᑦ ᖃᐅᔨᓴᖅᑕᐅᓂᑯᐃᑦ, ᖃᐅᔨᓇᓱᓪᓗᒋᑦ ᖃᓄᐃᓕᖓᓕᕐᓂᕆᔭᖏᑦ, ᐱᔭᑦᓴᐅᓂᖏᑦ, ᐋᖅᑭᐅᒪᔾᔪᑎᓄᑦ ᐱᓕᕆᐊᑦᓴᐃᑦ, ᐊᑐᖅᑐᐊᖅᑕᐅᔪᑦ ᑎᑎᕋᖅᓯᒪᔪᑦ ᖃᐅᔨᓴᖅᑕᐅᓂᑯᐃᑦ ᐱᖁᑎᖏᓪᓗ ᐊᑭᖏᑦ.

• ᐱᓕᕆᖃᑎᒌᓐᓇᕐᓗᒋᑦ ᓄᓇᓕᖕᓂ ᐃᒡᓗᓕᕆᔨᒃᑯᑦ ᑎᑭᐅᑎᓇᓱᒡᓗᑎᒃ ᐱᓕᕆᐊᒃᓴᖏᓐᓂᒃ ᐊᐅᓚᑦᑎᓂᕐᒧᑦ ᐊᖏᖃᑎᒌᒍᑎᖏᑦ ᒪᓕᒡᓗᒋᑦ, ᑐᓂᓯᕙᒃᖢᑎᒡᓗ ᐊᕐᕌᒍᓕᒫᒧᑦ ᐸᕐᓇᐅᑎᓂᒃ ᐊᒻᒪ ᐊᕐᕌᒍ ᒪᕐᕈᐃᕐᓗᒍ ᖃᓄᐃᑉᐸᓪᓕᐊᓂᖏᓐᓄᑦ ᐅᓂᒃᑳᓂᒃ.

• ᓇᓗᓇᐃᖅᓯᓂᕐᒧᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᑦ ᐋᖅᑭᐅᒪᑎᑕᐅᓂᖏᓐᓄᑦ ᐱᐅᓯᕚᓪᓕᕐᓗᒋᑦ ᐋᖅᑭᐅᒪᑎᑦᓯᓂᕐᒧᑦ ᐱᕚᓪᓕᕈᑕᐅᕙᙱᑦᑐᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᑦ ᖃᐅᔨᓴᖅᑕᐅᖃᑦᑕᖅᑐᑦ ᑎᑎᕋᖅᑕᐅᖃᑦᑕᖅᑐᓪᓗ, ᒪᑯᐊᓗ ᐃᓪᓗᐃᑦ ᖃᓄᐃᓐᓂᖏᓐᓂᑦ ᖃᐅᔨᓴᕐᓃᑦ, ᐅᖁᒃᓯᒪᔪᑦ, ᐊᒻᒪᓗ ᐅᖅᑰᓴᐅᑏᑦ ᒪᐅᖓᑐᐃᓐᓈᕇᒃᑯᑎᖓᑕ ᓱᓪᓗᓕᖏᑦ.

• ᐱᐅᓯᕚᓪᓕᖅᑎᑦᓯᖏᓐᓇᕐᓂᕐᒧᑦ ᑐᑭᓯᓇᖅᓯᑎᑦᓯᓂᕐᒧᑦ ᒪᓕᑦᓯᐊᖏᓐᓇᕐᓗᑎᓪᓗ ᐱᕙᓪᓕᐊᓂᕆᔭᐅᔪᓂᒃ ᐅᓂᒃᑳᓂᑦ ᓄᓇᕗᒻᒥ 3000 ᓴᖅᑭᑦᑎᓂᒃᑯᑦ ᖃᑦᓯᐅᓂᖏᑦ ᐃᓪᓗᐃᑦ ᓴᓇᔭᐅᓂᑦᓴᖏᓐᓂᒃ ᐱᔭᕇᖅᑕᐅᓯᒪᔪᓂᒃ ᓴᓇᔭᐅᔪᓂᓪᓘᓐᓃᑦ ᑕᐃᒪᙵᑦ 6−ᖓᓂ ᒪᓕᒐᓕᐅᕐᕕᖕᒥ ᐱᒋᐊᓚᐅᖅᑎᓪᓗᒍ ᓅᕙᐃᒻᕙ 2021-ᒥ ᐊᑐᕐᓗᑎᒃ ᓯᓚᑖᓂᙶᖅᑐᓂᒃ ᑎᑎᕋᖅᓯᒪᔪᑦ ᖃᐅᔨᓴᖅᑕᐅᓂᑯᐃᑦ ᐃᓪᓗᓕᕆᓂᕐᒧᑦ ᐊᖓᔪᖅᑳᑉ ᐊᓪᓚᕝᕕᖓᓂ (OCBO).

ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᑐᓕᖅᑎᑦᓯᕙᓪᓕᐊᒻᒥᔪᑦ ᒪᕐᕉᓐᓂᒃ ᓇᒻᒥᓂᖃᖅᑎᐅᔫᓐᓂᒃ ᖃᕆᑕᐅᔭᓕᕆᔾᔪᑎᓂᒃ ᐃᑲᔪᖅᑐᐃᔾᔪᑎᒃᓴᓂᒃ ᑖᒃᑯᓄᖓ ᐱᐅᓯᒋᐊᕈᑎᓄᑦ, ᐃᓚᒋᓪᓗᒍ ᐱᖁᑎᓄᑦ ᐸᕐᓇᐃᔨ ᐊᐅᓚᑦᓯᓂᐊᕐᓗᓂ ᐊᑐᔅᓲᔭᕈᓐᓇᕐᓂᕆᔭᖏᓐᓂᒃ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᓈᓴᖅᑕᐅᔪᓂᒃ ᐱᖁᑎᓂᓪᓗ ᐊᐅᓚᑦᓯᓂᕐᒧᑦ ᖃᕆᑕᐅᔭᒃᑯᑦ ᐱᐅᓯᒋᐊᕈᑕᐅᓂᐊᖅᑐᓂᒃ ᐊᓪᓚᕝᕕᓕᕆᔾᔪᑎᓄᑦ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᐊᑐᖅᑐᐊᖅᑕᐅᔪᒃᓴᓄᑦ ᓯᕗᓂᒃᓴᒥᓪᓗ ᐊᑐᖅᑐᐊᖅᑎᐅᖃᑦᑕᓛᖅᑐᑦ.

“ᑮᓇᐅᔭᖁᑎᒋᔭᓂᒃ ᖃᐅᔨᓴᖅᑎᒻᒪᕆᐅᑉ ᖃᐅᔨᔭᖏᑦ ᐊᑐᓕᖁᔨᔾᔪᑎᖏᓪᓗ ᓇᓗᓇᐃᖅᓯᕗᑦ ᐸᕐᓇᐅᑎᑦᑎᓐᓂᒃ ᐱᐅᓯᒋᐊᖅᑎᑦᓯᓇᓱᐊᖅᓱᑎᒃ ᖃᓄᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑦ ᐊᑐᐃᓐᓇᐅᑎᑦᓯᓲᖑᒻᒪᖔᑕ ᐊᔾᔨᒌᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᒃ ᐃᓚᒌᓄᑦ ᐃᒻᒥᑰᖅᑐᓄᓪᓗ ᓄᓇᕗᒻᒥ, ᐅᖃᖅᑐᖅ ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓂᒃ, ᖁᐊᓴ ᖁᓱᒐᖅ. "ᒐᕙᒪᕗᑦ ᐋᖅᑭᑦᓱᐃᑎᓪᓗᒋᑦ ᑲᑐᔾᔨᓗᑕ ᐱᓕᕆᐊᑦᓴᖅ ᑏᓯᒻᕙ 2021−ᒥ, ᐃᓕᑕᖅᓯᓚᐅᖅᑐᒍᑦ ᐱᐅᓯᕚᓪᓕᕆᐊᖃᓪᓚᕆᓐᓂᖏᓐᓂᑦ ᐃᓪᓗᐃᑦ ᖃᓄᐃᓐᓂᖏᓐᓄᑦ ᓄᓇᕗᒻᒥᐅᓄᑦ. ᖁᔭᒋᕙᕗᑦ ᑮᓇᐅᔭᓂᒃ ᖃᐅᔨᓴᖅᑎᒻᒪᕆᒃ ᐅᖃᐅᓯᖃᓚᐅᕐᒪᑦ ᐱᔪᒪᓂᕆᔭᑦᑎᓐᓂᒃ ᐃᓪᓗᑦᓯᐊᕙᓐᓂᒃ ᐃᓄᖁᑎᑦᑎᓐᓄᑦ ᐊᑐᓕᖁᔭᖏᓐᓄᓪᓗ, ᐃᑲᔪᖅᑐᐃᓪᓗᓂ ᑕᐅᑐᖅᑰᖅᑕᑦᑎᓐᓂᒃ ᓄᓇᕗᒻᒥ ᐃᓪᓗᓕᕆᓂᕐᒧᑦ ᑲᔪᓯᔾᔪᑕᐅᓲᓂᒃ."

ᑖᒃᑯᐊ ᑐᑦᓯᕋᐅᑎᐅᔪᖅ ᐱᓕᕆᐊᖑᔪᒪᔪᑦ ᐱᔭᕇᖅᑕᐅᓛᖅᑐᖅ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᓐᓄᑦ ᐃᓚᓕᐅᔾᔭᐅᓗᑎᓪᓗ ᐱᓕᕆᐊᖑᔪᑦᓴᓄᑦ ᐸᕐᓇᐅᑎᒧᑦ 2025−ᒥ,ᖃᖓᓗ ᓴᖅᑭᑕᐅᓛᕐᒪᖔᑦ ᐃᓪᓗᓕᕆᔨᕐᔪᐊᒃᑯᑦ ᐃᑭᐊᖅᑭᕕᖓᓐᓂ.