ᐃᖃᓗᐃᑦ, ᓄᓇᕗᑦ (ᔭᓄᐊᕆ 31, 2024) – ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪᓗ NCC ᐱᕙᓪᓕᐊᑎᑦᑎᔩᑦ (NCCD) ᖁᕕᐊᓱᒃᐳᑦ ᐅᖃᖃᕈᓐᓇᕋᒥᒃ ᐊᑎᓕᐅᖅᑕᐅᓂᖓᓄᑦ 2024−ᒧᑦ ᐊᕐᕌᒍᑕᒫᑦ ᓴᓂᕐᕙᒃᑕᐅᕙᒃᑐᓄᑦ ᐊᒻᒪᓗ ᓂᐅᕕᕐᓂᕐᒧᑦ ᐊᖏᖃᑎᒌᒍᑏᑦ (ᓴᓇᒪᓂᖓ−ᓴᓇᔭᐅᓂᖓᓄᑦ ᐊᖏᖃᑎᒌᒍᑏᑦ) ᓴᓇᔭᐅᓂᖏᓐᓄᑦ 166 ᓄᑖᖑᔪᑦ ᐃᒡᓗᒃᓴᐃᑦ – 146 ᑭᒃᑯᑐᐃᓐᓇᕐᓄᑦ ᐃᒡᓗᒃᓴᐃᑦ ᐊᒻᒪᓗ 20 ᐃᖅᑲᓇᐃᔭᖅᑎᓄᑦ ᐃᒡᓗᒃᓴᐃᑦ – 17−ᓂ ᓄᓇᕗᒻᒥ ᓄᓇᓕᖕᓂ.

“ᐱᒋᐊᖅᑎᑕᐅᓂᖏᑦ ᑖᒃᑯᐊ ᐊᖏᖃᒌᒍᑏᑦ ᑐᑭᓕᕇᖕᓂᖃᖅᑐᖅ ᐃᒡᓗᓕᐅᖃᑎᒌᖕᓂᖅ ᓄᓇᕗᑦ 3000 ᑕᐅᑐᙳᐊᖅᑕᖓᓂᒃ ᓴᖅᑭᔮᖅᑎᑦᑎᓪᓗᓂᓗ ᐊᒥᓱᕈᖅᐹᓪᓕᕐᔪᐊᕐᓂᖏᓐᓂᒃ ᐊᕐᕌᒍᑕᒫᑦ ᓄᑖᖑᔪᑦ ᑭᒃᑯᑐᐃᓐᓇᕐᓄᑦ ᐃᒡᓗᒃᓴᐃᑦ ᐱᔭᐅᔭᕆᐊᖃᓪᓚᕆᒃᑐᑦ ᓄᓇᕗᓗᒃᑖᕐᒥ,” ᐅᖃᓚᐅᖅᐳᖅ ᐃᖃᕆᓐ ᑕᕗᕈ, ᐊᖓᔪᖅᑳᒻᒪᕆᒃ ᐊᒻᒪᓗ ᐊᖓᔪᖅᑳᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. “ᑐᙵᕕᒋᔭᐅᖃᑕᐅᔪᖅ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥ NCC ᐱᕙᓪᓕᐊᑎᑦᑎᔨᒃᑯᓐᓄᑦ ᓴᖅᑭᔮᖅᑎᑕᐅᓂᖓ ᑮᓇᐅᔭᓄᑦ ᐊᑭᒋᔭᐅᔪᓐᓇᖅᑐᑦ ᐊᒻᒪᓗ ᐱᑕᖃᓕᖅᑎᑕᐅᕐᔪᐊᕐᓂᖏᓐᓄᑦ ᓄᑖᖑᔪᑦ ᐃᒡᓗᒃᓴᐃᑦ.”

ᐅᑭᐊᒃᓵᖑᔪᖅ ᓴᓇᓯᒋᐊᓛᖅᑐᑦ ᐅᑯᓂᖓ ᓄᓇᓕᖕᓂ: • ᐃᒡᓗᓕᒑᕐᔪᒃ (8 ᐃᒃᓗᒃᓴᐃᑦ) • ᑲᖏᖅᑐᒑᐱᒃ (8 ᐃᒃᓗᒃᓴᐃᑦ) • ᓴᓪᓕᖅ (12 ᐃᒃᓗᒃᓴᐃᑦ) • ᐊᐅᓱᐃᑦᑐᖅ (6 ᐃᒃᓗᒃᓴᐃᑦ) • ᐃᒡᓗᓕᒃ (20 ᐃᒃᓗᒃᓴᐃᑦ) • ᑭᒻᒥᕈᑦ (6 ᐃᒃᓗᒃᓴᐃᑦ) • ᑭᙵᐃᑦ (20 ᐃᒃᓗᒃᓴᐃᑦ) • ᑰᒑᕐᔪᒃ (8 ᐃᒃᓗᒃᓴᐃᑦ) • ᖁᕐᓗᖅᑑᖅ (12 ᐃᒃᓗᒃᓴᐃᑦ) • ᓇᐅᔮᑦ (8 ᐃᒃᓗᒃᓴᐃᑦ) • ᐸᓐᓂᖅᑑᖅ (16 ᐃᒃᓗᒃᓴᐃᑦ) • ᒥᑦᑎᒪᑕᓕᒃ (8 ᐃᒃᓗᒃᓴᐃᑦ) • ᖃᐅᓱᐃᑦᑐᖅ (6 ᐃᒃᓗᒃᓴᐃᑦ) • ᕿᑭᖅᑕᕐᔪᐊᖅ (6 ᐃᒃᓗᒃᓴᐃᑦ) • ᓴᓂᕋᔭᒃ (8 ᐃᒃᓗᒃᓴᐃᑦ) • ᓴᓂᑭᓗᐊᖅ (8 ᐃᒃᓗᒃᓴᐃᑦ) • ᑎᑭᕋᕐᔪᐊᖅ (6 ᐃᒃᓗᒃᓴᐃᑦ).

ᑲᑎᖦᖢᒋᑦ ᐊᖏᖃᑎᒌᒍᑎ ᐊᑭᖃᖅᑕᖅ $134,728,616−ᓂᒃ – ᖃᓂᒋᔮᓂ $670 ᐊᑐᓂ ᑭᑉᐹᕆᒃᑐᒧᑦ ᐃᓴᒐᖕᒧᑦ ᑕᒪᐃᓐᓂ ᓴᓇᔭᐅᓂᖓᓄᑦ.

2024−ᒧᑦ ᐊᕐᕌᒍᑕᒫᑦ ᓴᓂᕐᕙᒃᑕᐅᕙᒃᑐᓄᑦ ᐊᒻᒪᓗ ᓂᐅᕕᕐᓂᕐᒧᑦ ᐊᖏᖃᑎᒌᒍᑏᑦ ᓴᖅᑭᔮᖅᑎᑦᑎᕗᑦ ᐊᕐᕌᒍᖓᓂ ᒪᕐᕈᒋᔭᖓᓂᒃ ᖁᓕᖕᓂᒃ ᐊᕐᕌᒍᓄᑦ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑎᓕᐅᖃᑕᒋᓚᐅᖅᑕᖏᓐᓂᑦ NCC ᐱᕙᓪᓕᐊᑎᑦᑎᔨᒃᑯᖏᓐᓄᑦ ᐱᔪᓐᓇᕐᓂᖃᖅᑎᑕᐅᓂᖓᓄᑦ ᐃᒡᓗᖃᕐᓂᖅ ᐊᒻᒪᓗ ᑎᑭᐅᑎᔭᐅᓂᖏᓐᓄᑦ ᑮᓇᐅᔭᓕᐅᕈᑎᑦ ᓇᓃᓐᓂᖃᑦᑕᕐᓂᖏᓐᓂ ᑎᑭᐅᑎᔭᐅᓂᖓᓄᑦ ᐃᒡᓗᓕᐅᖃᑎᒌᖕᓂᖅ.

ᐊᑕᐅᓯᕐᒥ ᐊᕐᕌᒍᒥ, NCC ᐱᕙᓪᓕᐊᑎᑦᑎᔨᒃᑯᑦ ᓴᓇᓯᒋᐊᓚᐅᖅᐳᑦ 150−ᓂᒃ ᓄᑖᓂᒃ ᑭᒃᑯᑐᐃᓐᓇᕐᓄᑦ ᐃᒡᓗᒃᓴᓂᒃ. ᐃᒡᓗᒃᓴᓕᐅᕈᑎᓗᒃᑖᑦ ᑎᑭᓯᒪᓕᖅᑐᑦ, ᐊᒻᒪᓗ ᓴᓇᕙᓪᓕᐊᓕᖀᖅᑐᑦ ᑕᒪᐃᓐᓂᑲᓴᒃ ᓄᓇᓕᖕᓂ. NCC ᐱᕙᓪᓕᐊᑎᑦᑎᔨᒃᑯᑦ ᑭᖑᕙᖅᓯᒪᙱᑦᑐᑦ ᐱᐊᓂᒃᓯᔭᕆᐊᒃᓴᖅ ᑕᒪᐃᓐᓂᒃ 150−ᓂᒃ ᐃᒡᓗᒃᓴᓂᒃ ᐊᒡᒋᖅᑐᓂ 12 ᑕᖅᑭᑦ ᐃᓗᐊᓂ.

“ᑎᒥᕗᑦ ᐊᖏᖅᓯᒪᔪᑦ ᐊᐅᓚᔾᔭᒋᐊᖅᑎᑕᐅᓂᖏᓐᓄᑦ ᐃᓄᖕᓄᑦ ᓇᖕᒥᓂᕆᔭᐅᔪᑦ ᐊᒻᒪᓗ ᐅᑭᐅᖅᑕᖅᑐᕐᒥ ᐊᑑᑎᒃᓴᐃᑦ ᓴᓇᔭᐅᓂᖏᓐᓄᑦ ᐃᒡᓗᒃᓴᓂᒃ ᓄᓇᕗᒻᒥᐅᑕᓂᑦ ᓄᓇᕗᒻᒥᐅᑕᓄᓪᓗ,” ᐅᖃᓚᐅᖅᐳᖅ NCC ᐱᕙᓪᓕᐊᑎᑦᑎᔨᒃᑯᓐᓄᑦ ᐊᖓᔪᖅᑳᒻᒪᕆᒃ ᐊᒻᒪᓗ ᐊᖓᔪᖅᑳᖅ ᑲᓚᐅᕋᓐᓯ ᓯᓇᐅᑦ. “ᓄᓇᕗᑦ 3000 ᐅᐸᓗᖓᐃᔭᐅᑎ ᐃᓚᖃᖃᖅᐳᖅ ᑐᑭᖃᑦᑎᐊᖅᑐᓂᒃ ᐊᑑᑎᖃᑦᑐᐊᖅᑐᓂᒡᓗ ᐱᓕᒻᒪᒃᓴᕐᓂᕐᒧᑦ ᐱᓕᕆᐊᒃᓴᓂᒃ ᓯᕗᓕᖅᑎᐅᔾᔪᑎᒋᓪᓚᕆᓛᖅᑕᑦᑎᓐᓄᑦ ᐱᕙᓪᓕᐊᑎᑕᐅᓂᖏᓐᓄᑦ ᐃᓄᐃᑦ ᐱᔪᓐᓇᕐᓂᖏᑦ ᐃᖅᑲᓇᐃᔮᖃᕈᒪᔪᓄᑦ ᓴᓇᖃᑦᑕᕐᓂᕐᒥ. ᐱᓗᐊᖅᑐᒥᒃ, ᑐᕌᒋᔭᖃᖅᑐᒍᑦ ᐃᓄᖕᓂᒃ ᐃᖅᑲᓇᐃᔭᖅᑎᖃᕈᒪᓪᓗᑕ 30%−ᓂᒃ ᐋᔩᖃᑎᒌᒍᑎᒋᔭᑦᑐᓐᓄᑦ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᑦᑐᓐᓄᑦ ᑭᒃᑯᑐᐃᓐᓇᐃᑦ ᐃᒡᓗᒃᓴᖏᓐᓄᑦ ᑖᓐᓇᓗ ᑕᐅᑐᒃᖢᑎᒍᑦ ᐱᕕᒃᓴᐅᓂᖓᓂᒃ ᐱᓕᒻᒪᒃᓴᕐᓂᖅᑕᖃᓕᕐᓂᖅᓴᐅᓂᖓᓄᑦ ᐊᒻᒪᓗ ᐱᔪᓐᓇᕐᓂᖅᑕᖃᓕᕐᓂᖅᓴᐅᓂᖓᓄ ᐃᓄᖕᓄᑦ ᐃᒡᓗᓕᐅᕐᓂᕐᒧᑦ ᓴᓇᓂᕐᒥᒃ ᐃᖅᑲᓇᐃᔮᖃᖅᑐᓄᑦ.”

ᑲᑎᖦᖢᒋᑦ ᒥᒃᓴᐅᓴᒃᓯᒪᔪᑦ ᐊᑭᖓ ᐃᒡᓗᓕᐅᖃᑎᒌᖕᓂᖅ ᓄᓇᕗᑦ 3000 ᐅᐸᓗᖓᐃᔭᐅᑎᖓᓄᑦ $2.57 ᐱᓕᐊᓐ ᑖᓚᐅᕗᖅ ᓴᓇᔭᐅᓂᖏᓐᓄᑦ 3,000 ᐃᒡᓗᒃᓴᐃᑦ ᓄᓇᕗᒻᒥ ᐊᓂᒍᓚᐅᖅᑎᓐᓇᒍ 2030, ᑐᕌᕆᔭᐅᓪᓗᓂ ᖃᓂᒋᔮᓂ $890 ᒥᓕᐊᓐ (35 ᐳᓴᓐᑎᑦ) ᓇᖕᒥᓂᕆᔭᐅᔪᓂ ᑮᓇᐅᔭᓕᐅᕋᓱᐊᕈᑎᓂ ᐊᒻᒪᓗ ᖃᓂᒋᔮᓂ $1.68 ᐱᓕᐊᓐ (65 ᐳᓴᓐᑎᑦ) ᒐᕙᒪᒃᑯᓐᓄᑦ ᐊᐅᓚᑕᐅᔪᑦ ᑮᓇᐅᔭᓕᐅᕋᓱᐊᕈᑎᓂ.

ᖃᐅᔨᒋᐊᒃᑲᓐᓂᕈᒪᒍᕕᑦ ᐃᒡᓗᓕᐅᖃᑎᒌᖕᓂᖅ ᓄᓇᕗᑦ 3000 ᐅᐸᓗᖓᐃᔭᐅᑎᐅᑉ ᒥᒃᓵᓄᑦ, ᑕᑯᒋᐊᕐᓗᒍ, https://www.igluliuqatigiingniq.ca