ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2023-04-28
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ ᓄᓇᕗᒻᒥ ᐃᒡᓗᓕᐅᖅᑎᒃᑯᑦ ᐱᕙᓪᓕᐊᑎᑦᑎᔨᖏᑦ ᐊᑎᓕᐅᖅᐳᑦ ᐋᖅᑭᒃᓯᒪᓂᒃᓴᖓᓄᑦ ᑳᓐᑐᓛᒃᑕᐅᓯᒪᔪᑦ 150-ᓄᑦ ᓄᑖᓄᑦ ᐃᓄᖕᓄᑦ ᐊᑐᖅᑐᐊᖅᑕᐅᔪᒃᓴᑦ ᐃᒡᓗᓄᑦ ᓴᓇᔭᐅᓯᒋᐊᓛᖅᑐᑦ 2023−ᒥ ᐅᑭᐊᒃᓵᒃᑯᑦ
ᐃᖃᓗᐃᑦ, ᓄᓇᕗᑦ (ᐊᐃᕆᓕ 28, 2023) – ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᐊᒻᒪ ᓄᓇᕗᒻᒥ ᐃᒡᓗᓕᐅᖅᑏᑦ (NCCD) ᖁᕕᐊᓱᒃᐳᑦ ᑐᓴᖅᑎᑦᑎᔪᓐᓇᕐᒪᑕ ᐊᑎᓕᐅᖅᑕᐅᓂᖓᓂᒃ ᐋᖅᑭᒃᓯᒪᓂᒃᓴᖓᓄᑦ ᑳᓐᑐᓛᒃᑕᐅᓯᒪᔪᑦ ᓴᓇᔭᐅᓂᒃᓴᒧᑦ 150−ᓂᒃ ᓄᑖᓂᒃ ᐃᒡᓗᒃᓴᓂᒃ 8−ᓂᒃ ᓄᓇᕗᒻᒥ ᓄᓇᓕᖕᓂ. ᓴᓇᔭᐅᓯᒋᐊᓛᖅᑐᑦ 2023−ᒥ ᐅᑭᐊᒃᓵᒃᑯᑦ.
ᐋᖅᑭᒃᓯᒪᓂᒃᓴᖓᓄᑦ ᐊᖏᕈᑎᑦ ᐃᓚᒋᔭᐅᔪᑦ 2023-24 ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂᑦ ᐊᑐᖅᑎᑦᑎᓂᕐᒧᑦ ᐸᕐᓇᐅᑎᒥᑦ ᐃᒡᓗᓕᐅᖃᑎᒌᖕᓂᖅ, ᑕᐃᔭᐅᖕᒥᔪᖅ ᓄᓇᕗᑦ 3000 ᐅᐸᓗᖓᐃᔭᐅᑎᒥᑦ.
ᐋᖅᑭᒃᓯᒪᓂᒃᓴᖓᓄᑦ ᐋᖅᑭᓱᖅᑕᐅᓂᖓ ᐋᔩᖃᑎᒌᒍᑕᐅᓯᒪᔪᖅ ᐃᒡᓗᓕᐅᖅᑎᓄᑦ ᑳᓐᑐᕌᒃᑯᑦ 132−ᓄᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂᑦ ᐃᖃᓗᐃᑦ ᓯᓚᑖᓃᑦᑐᓂᑦ ᐃᓚᖃᖅᑐᑦ ᐊᕙᑎᓂᒃ ᓄᑖᓂᑦ ᐃᒡᓗᓂᑦ ᐊᑐᓂᑦ ᐊᕐᕕᐊᓂᑦ, ᑲᖏᖅᖠᓂᕐᒥᑦ, ᖃᒪᓂᑦᑐᐊᕐᒥᑦ, ᐃᒃᐱᐊᕐᔪᖕᒥᑦ, ᐅᖅᓱᖅᑑᕐᒥᑦ, ᐊᒻᒪ ᑕᓗᕐᔪᐊᕐᒥᑦ, ᐊᒻᒪ 12−ᓂᑦ ᐃᒡᓗᒃᓴᓂᑦ ᐃᖃᓗᑦᑑᑦᑎᐊᕐᒥᑦ.
ᑲᑎᖦᖢᒋᑦ ᑳᓐᑐᓛᒃᑕᐅᓯᒪᔪᑦ ᐊᑭᖏᑦ (ᐃᓚᓕᐅᔾᔭᐅᓪᓗᑎᒃ ᐋᖅᑭᒃᓯᒪᓂᒃᓴᖓ ᐊᒻᒪ ᐃᓂᒃᓴᖓᑕ ᐊᑭᖓ) ᑖᒃᑯᓇᙵᑦ 132-ᓂᒃ ᐃᒡᓗᓂᒃ ᐊᑭᖃᖅᑎᒋᕗᖅ $92.5 ᒥᓕᐊᓂᒃ – $600 ᑭᑉᐹᕆᒃᑐᖅ ᐃᓯᒐᖅ ᐊᑕᐅᓯᖅ ᓴᓇᔭᐅᓂᖓᓄᑦ ᐊᑭᖓ. 18−ᑲᓐᓂᕐᓂᒃ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂᒃ ᐊᖏᖅᑕᐅᔪᖃᓚᐅᕆᕗᖅ ᐃᖃᓗᖕᓂ ᑲᑎᖦᖢᒋᑦ ᑳᑦᑐᓛᖓᑕ ᐊᑭᖓᓄᑦ $12.8 ᒥᓕᐊᓐ.
"ᑲᔪᓯᑎᑕᐅᓂᖏᑦ ᑖᒃᑯᐊ ᐋᖅᑭᒃᓯᒪᓂᒃᓴᖓᑕ−ᓴᓇᔭᐅᓂᖓᓄᑦ ᑳᓐᑐᕌᑦ 150ᓄᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓄᑦ ᓇᓕᒧᓐᓂᖃᖅᑐᑦ ᑕᐅᑐᙳᐊᖅᑕᐅᔪᒥᑦ ᓄᓇᕗᒻᒥᑦ 3000−ᓂᑦ ᐊᒻᒪ ᑕᑯᒃᓴᐅᑎᑦᑎᔪᖅ ᐊᒥᓱᕈᕆᐊᖅᓯᒪᓪᓚᕆᒃᑐᓂᑦ ᐊᕐᕌᒍᑕᒫᑦ ᐃᒡᓗᒃᓴᓂᑦ ᓄᑖᓂᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂᑦ ᐱᔭᕆᐊᖃᓪᓚᕆᒃᑐᓂᑦ ᓄᓇᕗᓕᒫᒥᑦ," ᐅᖃᓚᐅᖅᐳᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᐅᓚᑦᑎᔨᒻᒪᕆᖓ ᐊᒻᒪ ᐊᖓᔪᖅᑳᖅ ᐃᐅᕆᓐ ᑎᕗᕉ. "ᐃᓚᖓᑦ ᑐᙵᕕᐅᔪᖅ ᐱᓕᕆᖃᑎᒌᖕᓂᕐᒧᑦ ᐊᖏᖃᑎᒌᒍᑎᒥ NCCD−ᑯᓐᓄᑦ ᑕᑯᒃᓴᐅᑎᓐᓂᐊᕐᓗᒋᑦ ᐊᑑᑎᖃᕐᓂᖏᑦ ᑮᓇᐅᔭᑦ ᐅᔾᔨᕆᓗᒋᓪᓗ ᐅᓄᖅᓯᓯᒪᓂᖏᓐᓂᑦ ᐊᑐᐃᓐᓇᐅᑎᑕᐅᒋᐊᓕᑦ ᓄᑖᓂᑦ ᐃᒡᓗᓂᑦ. ᑳᓐᑐᕌᑉ ᐊᑭᖓ ᑕᑯᒃᓴᐅᑎᑦᑎᔪᖅ ᐊᑭᑭᓪᓕᒋᐊᖅᓯᒪᓪᓚᕆᒃᑐᒥᑦ ᐃᒡᓗᓕᐅᓂᕐᒧᑦ ᐊᑭᖏᑦ ᒪᓕᒡᓗᒋᑦ ᐊᑭᑦᑐᕋᐅᑎᓄᑦ ᐅᑭᐅᖕᓄᑦ ᒪᕐᕉᖕᓄᑦ, ᑕᒪᓐᓇ ᓇᓗᓇᐃᖅᓯᔾᔪᑕᐅᔪᖅ ᑕᒪᓐᓇ ᓄᕙᒡᔪᐊᕐᓇᕐᒧᑦ−ᐊᑭᑭᓪᓕᕙᓪᓕᐊᓂᖏᑦ ᐊᑭᑦᑐᐸᓪᓕᐊᑐᐃᓐᓇᕐᓂᖏᓐᓂᒃ."
“ᑲᑐᔾᔨᖃᑎᒌᒃᐳᑦ ᐊᖏᖅᓯᒪᖕᒪᑕ ᐋᖅᑭᐅᒪᑎᑦᑎᓂᕐᒥᑦ ᐅᑭᐅᖅᑕᖅᑐᒥ ᐊᑐᒐᒃᓴᓂ ᐃᒡᓗᓕᐅᕆᓂᐊᕐᓗᑎᒃ ᓄᓇᕗᒻᒥᐅᓄᑦ ᓄᓇᕗᒻᒥᐅᓂ. ᓄᓇᕗᑦ 3000-ᒥ ᐸᕐᓇᐅᑦ ᐃᓚᓕᐅᔾᔨᕗᖅ ᑐᑭᖃᑦᑎᐊᖅᑐᓂᒃ ᐊᒻᒪ ᐊᑑᑎᖃᑦᑎᐊᖅᑐᓂᒃ ᐃᓕᓐᓂᐊᒐᒃᓴᓂᒃ ᖃᐅᔨᒪᒋᐊᕈᑕᐅᓂᐊᖅᑐᓂᒃ ᐱᕙᓪᓕᐊᑎᑦᑎᑎᓪᓗᑕ ᐊᔪᖅᑕᐅᙱᑦᑐᓂᒃ ᐃᓄᖕᓄᑦ ᐃᖅᑲᓇᐃᔮᖃᕈᒪᔪᓄᑦ ᐃᖅᑲᓇᐃᔮᓂᒃ. ᐱᓗᐊᖅᑐᒥᒃ, ᐃᓄᖕᓂᒃ ᐃᖅᑲᓇᐃᔭᖅᑎᖃᖅᐳᒍᑦ 30%−ᒥᒃ ᐋᔩᖃᑎᒌᒍᑎᑦᑎᓐᓄᑦ ᐱᓕᕆᖃᑎᒌᒍᑎᑦᑎᓐᓄᑦ ᑳᓐᑐᓛᒃᑕᐅᓯᒪᔪᓄᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓄᑦ, ᑕᑯᓗᒍᓗ ᑖᓐᓇ ᐱᕕᒃᓴᐅᓂᖓᓂᒃ ᐅᓄᖅᓯᒋᐊᖅᑎᓪᓗᒋᑦ ᐱᓕᒻᒪᒃᓴᖅᑎᑦᑎᓂᖅ ᐊᒻᒪ ᐱᔪᓐᓇᕐᓂᖅᑖᖅᐸᓪᓕᐊᓂᖅ ᐃᓄᖕᓄᑦ ᐃᒡᓗᓕᐅᖅᑎᓄᑦ," ᐅᖃᓚᐅᖅᐳᖅ NCCD ᐊᐅᓚᑦᑎᔨᒻᒪᕆᖓ ᐊᒻᒪ ᐊᖓᔪᖅᑳᖅ ᑲᓕᐅᕋᓐᔅ ᓯᓈᑦ. "ᑖᓐᓇ ᑳᓐᑐᓛᖑᔪᖅ ᓴᖅᑭᑎᑦᑎᓂᐊᕆᕗᖅᑕᐅᖅ ᐊᒥᓱᓂᒃ ᐱᕕᒃᓴᓂᒃ NCCD−ᑯᓐᓄᑦ ᐱᓕᕆᖃᑎᖃᕐᓂᐊᕐᓗᑎᒃ ᓄᓇᓕᖕᓂ ᐊᕕᒃᑐᖅᓯᒪᔪᓂᒃ ᑲᒻᐸᓂᒋᔭᐅᔪᓂᒃ ᐱᓕᕆᐊᖃᕐᓂᐊᕐᓗᑎᒃ ᐊᔾᔨᒌᙱᑦᑐᓂᒃ ᐊᖏᑎᒋᓂᖓᓄᑦ ᐱᓕᕆᐊᒃᓴᕆᔭᓄᑦ."
ᑲᑎᖦᖢᒋᑦ ᐊᑭᒋᓂᐊᕋᓱᒋᔭᐅᔪᖅ ᓄᓇᕗᒻᒥ 3000−ᒧᑦ ᖃᓄᐃᓕᐅᕈᑕᐅᔪᒪᔪᒧᑦ $2.57−ᐱᓕᐊᙳᕗᖅ ᓴᖅᑭᑦᑎᓂᐊᕐᓗᓂ 3,000-ᓂᒃ ᐃᒡᓗᓂᒃ ᓄᓇᕘᓕᒫᒥ 2030-ᒧᑦ ᑎᑭᓪᓗᒍ, $890 ᒥᓕᐊᓐ ᖃᓂᒋᔮᓂ (35-ᐳᓴᓐᑎᖓ) ᑐᕌᖓᑎᑕᐅᓪᓗᓂ ᑮᓇᐅᔭᖃᖅᑎᑕᐅᔪᒪᓪᓗᑎᒃ ᐃᓛᒃᑰᖅᑐᓂᒃ ᑮᓇᐅᔭᓕᐅᕋᓱᐊᖅᑎᓂᒃ ᐊᒻᒪ $1.68-ᐱᓕᐊᓐ ᖃᓂᒋᔮᓂ (65-ᐳᓴᓐ) ᑐᕌᒐᖃᖅᖢᑎᒃ ᑮᓇᐅᔭᖃᖅᑎᑕᐅᔪᒪᓪᓗᑎᒃ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ 3000 ᐸᕐᓇᐅᑎᑉ ᒥᒃᓵᓄᑦ, ᐅᕗᖓ ᑕᑯᒋᐊᕐᓗᑎᑦ, www.Igluliuqatigiingniq.ca.
