ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
2023-06-06
ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᒡᓗᓂᒃ ᓂᐅᕕᕐᓂᐊᖅᑐᑦ 22-ᓂᒃ ᐊᑐᖅᑐᐊᖅᑕᐅᔪᒃᓴᓂᒃ ᑖᒃᑯᓇᙵᑦ ᓴᒃᑯ ᐃᒡᓗᕐᔪᐊᓕᐅᖅᑎᑯᓐᓂ
ᐃᖃᓗᐃᑦ, ᓄᓇᕗᑦ (ᔫᓂ 6, 2023) – ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑐᓴᖅᑎᑦᑎᖅᑲᐅᕗᑦ ᐅᓪᓗᒥ ᓂᐅᕕᕐᓂᐊᕐᓂᖏᓐᓂᒃ ᐊᖏᖃᑎᒌᒍᑎᒃᑯᑦ ᓴᒃᑯᒃᑯᓐᓂ ᐃᓱᒪᒋᔭᐅᑦᑎᐊᖅᓯᒪᔪᓂᒃ ᐃᒡᓗᓄᑦ ᐋᖅᑭᒋᐊᕈᑎᒃᓴᑦ 22−ᓄᑦ ᐋᖅᑭᒃᓱᒐᕐᓄᑦ ᐃᒡᓗᓄᑦ ᐃᑲᔫᑕᐅᓗᑎᒃ ᐃᒡᓗᓕᐅᖅᑕᐅᓵᓕᔪᓐᓇᕐᓗᑎᒃ ᐊᒻᒪ ᐃᓄᐃᑦ ᐃᓚᐅᔪᓐᓇᖁᓪᓗᒋᑦ ᓄᓇᓕᖕᓂ ᐱᖁᑎᑖᕆᔭᐅᕙᒃᑐᓄᑦ. ᓄᓇᕗᒻᒥ ᐃᒡᓗᓕᐅᖅᑏᑦ ᐱᔭᕇᖅᓯᓂᐊᖅᑐᑦ ᐃᓕᐅᖅᑲᖅᑕᐅᒋᐊᓕᖕᓂᒃ ᐃᓪᓗᒃᓴᓄᑦ ᑎᑭᑉᐸᑕ ᓄᓇᓕᖕᓄᑦ.
2/3-ᐸᓗᐃᑦ ᐃᒡᓗᐃᑦ ᐊᐅᓪᓚᖅᑎᑕᐅᓂᐊᖅᑐᑦ ᐊᕐᕕᐊᓄᑦ, ᑲᖏᖅᖠᓂᕐᒧᑦ, ᖃᒪᓂ'ᑐᐊᕐᒧᑦ, ᐃᒃᐱᐊᕐᔪᖕᒧᑦ, ᐅᖅᓱᖅᑑᕐᒧᑦ, ᑕᓗᕐᔪᐊᕐᒧᑦ ᐊᒻᒪ ᐃᖃᓗᒃᑑᑦᑎᐊᒧᑦ. ᐊᑐᖅᑕᐅᓂᐊᖅᐳᑦ ᐃᓂᒋᔭᐅᓚᐅᑲᖕᓂᐊᕐᓗᑎᒃ ᓄᓇᕗᒻᒥ ᐃᒡᓗᓕᐅᖅᑎᒃᑯᓐᓄᑦ 132−ᓂᒃ ᓄᑖᓂᒃ ᐃᒡᓗᓕᐅᕐᓂᐊᖅᑐᑦ ᑖᒃᑯᓇᙵᑦ 7−ᖑᓪᓗᑎᒃ ᓄᓇᓕᖕᓂ.
ᐊᒻᒪ ᓱᓕ, 8−ᓂᒃ ᐃᒡᓗᓂᒃ ᓂᐅᕕᐊᖑᔪᖃᕐᓂᐊᖅᐳᖅ ᓴᓂᕋᔭᖕᒧᑦ, ᑭᙵᕐᓄᑦ, ᓴᓂᑭᓗᐊᕐᒧᑦ ᐊᒻᒪ ᐸᖕᓂᖅᑑᕐᒧᑦ, ᐃᓄᓕᕆᔨᒃᑯᑦ ᐃᒡᓗᓂᒃ ᐊᑐᕐᓂᐊᖅᐳᑦ ᐃᑲᔫᑕᐅᓗᑎᒃ ᐱᔭᕆᐊᖃᓪᓚᕆᒃᑐᓄᑦ ᓲᕐᓗ ᐃᒡᓗᒋᔭᐅᓚᐅᑲᒍᓐᓇᖅᑐᓄᑦ ᐅᕝᕙᓘᓐᓃᑦ ᐃᒡᓗᒋᔭᐅᓚᐅᑲᒍᓐᓇᖅᑐᓄᑦ ᐃᓄᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᓪᓚᕆᖕᓄᑦ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᐃᓄᓕᕆᔨᒃᑯᓐᓂ ᐋᖅᑭᒃᓯᓇᓱᒡᓗᑎᒃ ᐸᕐᓇᐅᑎᒥᒃ ᑖᒃᑯᓄᖓ ᐃᒡᓗᓄᑦ ᓄᓇᓕᖕᓄᑦ ᑎᑭᓚᐅᙱᓐᓂᖏᓐᓂᒃ.
ᑖᒃᑯᐊ ᐃᒡᓗᒋᔭᐅᑲᐃᓐᓇᕈᓐᓇᖅᑐᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐱᖁᑎᒌᓐᓇᕐᓂᐊᖅᑕᖏᑦ ᑭᓯᐊᓂ ᐱᔭᕆᐊᖃᕈᓐᓃᖅᐸᑕ ᐃᒡᓗᓕᐅᖅᑎᐅᑲᐃᓐᓇᖅᑐᑦ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐋᖅᑭᒋᐊᖅᓯᒃᑲᓐᓂᓕᕐᒥᓗᑎᒃ ᐋᖅᑭᒃᓱᖅᑕᐅᓯᒪᔪᓂᒃ ᐃᒡᓗᓂᒃ ᐊᑐᖅᑕᐅᖃᑦᑕᕐᓂᐊᖅᑐᓂᒃ ᐊᑭᑐᓗᐊᙱᑦᑐᓂᒃ ᐃᒡᓗᓂᒃ ᐊᑐᖅᑐᐊᒐᒃᓴᓂᒃ, ᐃᒡᓗᒋᔭᐅᓚᐅᑲᒍᓐᓇᖅᑐᓂᒃ (ᐅᕝᕙᓘᓐᓃᑦ ᕿᒫᕝᕕᖕᓂᒃ), ᐊᒻᒪ/ᐅᕝᕙᓘᓐᓃᑦ ᐃᓄᓕᕆᔨᒃᑯᓐᓂ ᑐᕌᒐᕆᔭᐅᔪᓂᒃ ᐃᒡᓗᓂᒃ.
"ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑲᔪᓯᓂᐊᖅᑐᑦ ᐃᓚᐅᑎᑦᑎᓗᑎᒃ ᓂᐅᕕᐊᒃᓴᓂᑦ ᐋᖅᑭᒃᓯᒪᓂᒃᓴᖓᓄᑦ−ᓴᓇᔭᐅᓂᖓᓄᑦ ᐋᖅᑭᒃᓯᒪᓂᒃᓴᖓᓄᓪᓗ−ᓴᓇᔭᐅᓂᕐᒧᑦ ᐊᑐᒐᒃᓴᓂᑦ, ᖁᕕᐊᓱᒃᐳᒍᑦ ᐱᕕᖃᕐᓂᑦᑎᓐᓂᒃ ᓂᐅᕕᕐᓂᕐᒥᒃ 22 ᐊᑭᑐᓗᐊᙱᑦᑐᓂᒃ, ᓴᓇᔭᐅᕙᒌᖅᑐᓂᒃ ᐃᒡᓗᓂᑦ SIBS−ᑯᓐᓂ, ᐃᓄᖕᓄᑦ ᓇᖕᒥᓂᕆᔭᖅ ᑎᒥᐅᔪᖅ, ᐊᑐᖅᑎᑕᐅᓂᐊᖅᑐᖅ ᐊᐅᔭᖓᓂ 2023," ᐅᖃᖅᑐᖅ ᔪᐊᓂ ᐸᓪᓗᖅ, ᐊᖏᔪᖅᑳᑉ ᐃᑲᔪᖅᑎᖓ ᐱᓕᕆᖃᑎᖓ ᒥᓂᔅᑕᐅᑉ ᑐᒡᓕᐊ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ. "ᐃᒡᓗᒃᓴᖃᖅᑎᑦᑎᒋᐊᒃᑲᓐᓂᕐᓂᖅ ᓄᓇᕗᒻᒥ ᓄᓇᓕᖕᓂ ᕿᓚᒻᒥᐅᓂᖅᐹᒃᑯᑦ ᓯᕗᓪᓕᐅᔾᔭᐅᓯᒪᔪᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. ᑖᒃᑯᐊ ᐋᖅᑭᒃᓱᒐᐅᔮᖅᑐᑦ ᒪᓕᒃᐳᑦ ᒪᓕᒋᐊᓕᓕᒫᓄᑦ, ᐃᓚᒋᔭᐅᓪᓗᓂ ᐃᑭᑦᑕᐃᓕᓂᖅ, ᐃᑭᐊᕐᒥᓕᖅᓱᖅᓯᒪᑦᑎᐊᖅᖢᑎᒡᓗ ᓄᓇᕗᒥᐅᓄᑦ ᑐᕌᖓᓪᓗᑎᒃ."
"ᐊᓕᐊᓇᐃᒍᓱᒃᑐᒍᑦ SIBS−ᑯᑦ ᑕᒪᑐᒥᖓ ᐱᓕᕆᐊᖃᕐᓂᐊᕐᓂᖏᓐᓂᒃ ᐱᓕᕆᐊᖃᖅᑎᓪᓗᑕ ᐱᒻᒪᕆᐊᓗᖕᓄᑦ ᑐᕌᕆᔭᐅᔪᓄᑦ ᓄᓇᕗᒻᒥ 3000−ᓂᒃ ᐃᒡᓗᓕᐅᕐᓂᐊᖅᑎᓪᓗᑕ," ᑕᐃᒪᓐᓇ ᑕᐃᕕᑦ ᖃᑯᖅᑎᓐᓂᖅ ᐅᖃᓚᐅᖅᐳᖅ, ᐊᖓᔪᖅᑳᖅ ᐊᐅᓚᑦᑎᔨᓪᓗᐊᑕᕆᔭᐅᔪᕐᓗ ᓴᒃᑯᒃᑯᑦ ᑮᓇᐅᔭᓕᐅᕈᑕᐅᒃᑲᓂᕋᓱᒃᑐᓄᑦ ᑯᐊᐳᕇᓴᒧᑦ. "ᐅᒃᐱᕈᓱᓪᓚᕆᒃᐳᒍᑦ SIBS−ᑯᑦ ᐊᓪᓗᕆᐊᕈᑎᑦᑎᐊᕙᐅᓂᖓᓂᒃ ᐃᑲᔫᑕᐅᓇᓱᒃᖢᓂ ᐃᒡᓗᑭᒃᓴᓗᐊᕐᓂᕐᒧᑦ ᐊᒻᒪ ᐃᓄᖕᓂᒃ ᐃᖅᑲᓇᐃᔭᖅᑎᖃᙱᓗᐊᕐᓂᕐᒧᑦ ᐃᒡᓗᓕᐅᖅᑎᓂᒃ. ᐊᕐᕕᐊᓂ ᒪᑐᐃᓚᐅᖅᑎᓪᓗᒍ, SIBS ᐊᖏᕐᕋᕆᔭᐅᔪᑦ ᓴᓇᔭᐅᓂᐊᖅᑐᑦ ᐃᓄᖕᓄᑦ, ᐃᓄᖕᓄᑦ ᑐᕌᖓᓗᑎᒃ. ᐊᒻᒪᓗ ᑕᒪᓐᓇ ᓵᓚᒃᓴᕈᑕᐅᕗᖅ ᐊᖏᕐᕋᒥ ᑲᔪᓯᑦᑎᐊᕐᓂᕐᒧᑦ ᐊᒻᒪᓗ ᐅᐱᒍᓱᓐᓂᐅᓪᓗᓂ."
ᑲᑎᖦᖢᒋᑦ ᐊᑭᖏᑦ ᐃᒡᓗᒥᐅᑕᓄᑦ ᐃᒡᓗᒧᑦ $600-ᖑᓂᐊᖅᐳᖅ ᑭᑉᐹᕆᒃᑐᖅ ᐃᓯᒐᒃ ᐊᑕᐅᓯᖅ; ᑭᓯᐊᓂ, ᑖᓐᓇ ᐊᑭᖓ ᒥᒃᖠᒋᐊᖅᑕᐅᒃᑲᓐᓂᕐᓂᐊᖅᑐᖅ ᐊᑭᖓᓄᑦ ᐃᒡᓗᒋᔭᐅᓚᐅᑲᒃᑐᓄᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑭᓖᓇᔭᓚᐅᖅᐳᑦ 132-ᓂᒃ ᐃᒡᓗᓕᐅᖅᑐᓂᒃ. ᑖᓐᓇ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᖅ ᑭᒡᒐᖅᑐᐃᕗᖅ ᖁᕕᐊᓇᒻᒪᕆᒃᑐᓂᒃ ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᓴᖅᑭᔮᓕᖅᑎᑦᑎᔪᒪᓪᓗᑎᒃ ᓄᓇᕗᒻᒥ 3000−ᓂᒃ ᑐᕌᕆᔭᐅᔪᒪᒻᒪᕆᒃᑐᒥᒃ ᑕᑯᔪᓐᓇᖅᓯᓗᑎᒃ 3000−ᓂᒃ ᓄᑖᓂᒃ ᐃᒡᓗᕐᔪᐊᓂᒃ ᓄᓇᕗᒻᒥ 2030−ᒧᑦ ᑎᑭᓪᓗᒍ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ 3000 ᐱᕙᒌᔭᐅᑎᐅᑉ ᒥᒃᓵᓄᑦ, ᐅᕗᖓ ᑕᑯᒋᐊᕐᓗᑎᑦ,
www.Igluliuqatigiingniq.ca
