ᐃᖃᓗᐃᑦ, ᓄᓇᕗᑦ (ᑎᓯᐱᕆ 4, 2025) - ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖁᕕᐊᓱᒃᐳᑦ ᑐᓴᖅᑎᑦᑎᔪᓐᓇᕐᒪᑕ ᐃᓚᒋᐊᖅᑕᐅᓂᖓᓂ ᑲᓇᑕᒥ−ᓄᓇᕗᒻᒥ ᐃᒡᓗᓕᕆᓂᕐᒧᑦ ᐃᑲᔫᑎᒃᓴᑦ (CNHB), ᐊᖏᓂᖅᓴᒥᒃ ᑐᑭᖃᕐᓂᖅᓴᒥᒡᓗ ᐃᑲᔪᖅᑐᐃᓗᑎᒃ ᓄᓇᕗᒻᒥᐅᓄᑦ.

ᓯᕗᓪᓕᖅᐹᑦᑎᐊᒥ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑐᓂᓯᓂᐊᖅᑐᑦ $600 ᑕᖅᑭᑕᒫᑦ ($7,200 ᐊᕐᕌᒍᑕᒫᖅ) ᐃᒡᓗᒥᒃ ᓇᖕᒥᓂᖃᖅᑎᓄᑦ ᐃᑲᔫᑎᓂᒃ, ᒪᓂᒪᑎᑦᑎᓗᑎᒃ ᑖᒃᑯᓄᖓ, ᑖᒃᓰᔭᒐᒃᓴᐅᙱᑦᑐᒥᒃ ᑮᓇᐅᔭᑎᒍᑦ ᐃᑲᔫᑎᓂᒃ ᐱᔪᓐᓇᖅᑎᑕᐅᔪᓄᑦ ᓄᓇᕗᒻᒥᐅᓄᑦ ᐃᑲᔪᕐᓗᒋᑦ ᐋᖅᑭᒋᐊᕈᑕᐅᓗᓂ ᐊᑭᑐᓗᐊᕐᓂᖓᓄᑦ ᐃᒡᓗᒥᒃ ᓇᖕᒥᓂᖃᕐᓂᖅ. ᐃᒻᒪᖄ, $6 ᒥᓕᐊᓐ ᖃᓂᒋᔮᓂ ᑮᓇᐅᔭᑦ ᐊᑐᐃᓐᓇᐅᓂᐊᖅᑐᑦ 2028−ᒧᑦ ᑎᑭᓪᓗᒍ, ᖃᑕᙳᑎᒌᑦ ᐃᑲᔪᖅᑕᐅᓗᑎᒃ ᐊᐅᓚᑦᑎᔭᕆᐊᖃᖅᑎᓪᓗᒋᑦ ᐃᒡᓗᒥᓄᑦ ᐊᑭᓕᖅᓱᕆᐊᓕᖕᓂᒃ ᐊᒻᒪ ᐊᖏᕐᕋᖅᓯᒪᑦᑎᐊᖏᓐᓇᕐᓗᑎᒃ.

“ᑖᓐᓇ ᐊᖏᒡᓕᒋᐊᖅᑕᐅᓂᖓ ᑕᑯᒃᓴᐅᑎᑦᑎᕗᖅ ᐱᓕᕆᐊᖃᓪᓚᕆᒍᒪᓂᑦᑎᓐᓂᒃ ᓄᓇᕗᒻᒥᐅᑦ ᐃᒡᓗᖃᖅᑎᑕᐅᖏᓐᓇᖁᓪᓗᒋᑦ,” ᒪᓕᒐᓕᐅᖅᑎ ᓯᓯᐅᓪ ᓇᓪᕚᓇ ᓚᐃᐅᓪ ᐅᖃᖅᑐᖅ, ᒥᓂᔅᑕ ᑲᒪᒋᔭᒃᓴᓕᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. “ᑖᔅᓱᒧᖓ ᓄᑖᒧᑦ ᐃᑲᔫᑎᒧᑦ, ᑲᒪᒋᔭᖃᖅᑐᒍᑦ ᐊᔾᔨᐅᖏᑦᑐᓂᑦ ᐊᑐᓪᓚᕆᒃᑐᓂᑦ ᓇᖕᒥᓂᖃᖅᑐᓂᑦ ᐃᓪᓗᒥᑦ ᓄᓇᕗᒻᒥ, ᐊᒃᓱᕈᕐᓇᓗᐊᕈᓐᓃᖅᑎᒃᑲᓐᓂᕐᓗᒍ ᐃᓪᓗᓕᕆᔨᒃᑯᑦ ᐃᓪᓗᖁᑎᖏᓐᓂᑦ, ᐃᑲᔪᖅᑐᐃᓗᑎᒡᓗ ᐃᓚᒌᓂᑦ ᐊᖏᕐᕋᖏᓐᓃᖏᓐᓇᕈᒪᔪᓂᑦ.”

ᑲᓇᑕᐅᑉ ᒐᕙᒪᖓ ᐱᒃᑯᒍᓱᒃᐳᑦ ᐱᓕᕆᖃᑎᖃᕆᐊᒃᓴᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐊᓯᔾᔨᒐᒃᓴᐅᔪᓂᒃ ᑭᐅᔪᓐᓇᑦᑎᐊᖅᑐᓂᒡᓗ ᐃᑲᔪᖅᑐᐃᔾᔪᑎᓄᑦ ᐊᔾᔨᐅᙱᑦᑐᒥᑦ ᐃᒡᓗᓕᕆᓂᕐᒧᑦ ᐊᒃᓱᕈᕐᓇᖅᑐᓄᑦ ᓄᓇᕗᒻᒥ, “ᐅᖃᖅᐳᑦ ᒪᓕᒐᓕᐅᖅᑎ ᔪᐊᔾᔨ ᕌᐳᑦᓴᓐ, ᒥᓂᔅᑕ ᐃᒡᓗᓕᕆᓂᕐᒧᑦ ᒪᑭᒪᔾᔪᑎᓄᓪᓗ ᐊᒻᒪᓗ ᒥᓂᔅᑕ ᑲᒪᒋᔭᒃᓴᓕᒃ ᐸᓯᕕᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᔪᑦ ᑲᓇᑕᒥ. “ᐊᖏᕈᑎᖃᖅᓯᒪᕗᒍᑦ ᐊᑐᐃᓐᓇᐅᑎᑦᑎᓂᕐᒥᑦ ᐊᑦᑕᕐᓇᙱᑦᑐᒥᑦ, ᐊᑭᑐᓗᐊᙱᑦᑐᓂᒃ ᐊᖏᕐᕋᓂᑦ ᑭᒃᑯᓕᒫᓄᑦ ᓄᓇᕗᒻᒥ ᓇᖕᒥᓂᕆᔪᓐᓇᖅᑕᖏᓐᓂ.”

ᐱᔪᓐᓇᖅᑎᑕᐅᔪᑦ ᒪᓕᖕᓂᐊᖅᐳᑦ ᐃᒡᓗᒥᐅᖃᑎᒌᑦ ᑮᓇᐅᔭᓕᐊᖏᓐᓂᑦ. ᐱᓇᔪᒃᑐᑦ ᓇᖕᒥᓂᖃᕆᐊᖃᖅᐳᑦ ᐃᒡᓗᒥᐅᑕᐅᓗᑎᒡᓗ ᐊᖕᕐᕋᕆᓗᓂᐅᒡᓗ ᐱᖃᑦᑕᙱᓪᓗᓂᓗ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᒡᓗᒥᐅᖃᑎᒌᓄᑦ ᐃᑲᔫᓯᐊᖓᓂᒃ.

ᑐᒃᓯᕋᐅᑎᑦ ᓇᖕᒥᓂᖃᖅᑎᓄᑦ ᐃᑲᔫᑎᓄᑦ ᐊᑐᐃᓐᓇᐅᓕᕐᓂᐊᖅᐳᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐃᑭᐊᖅᑭᕕᖓᒍᑦ ᐅᕙᓂ https://www.nunavuthousing.ca/programs/canada-nunavut-housing-benefit ᐅᖄᓚᓗᑎᓪᓘᓐᓃᑦ 1-844-413-9355−ᒧᑦ. ᐃᓯᖅᐸᓪᓕᐊᔪᑦ ᐃᖅᑲᓇᐃᔭᖅᑎᑦ ᐃᑲᔪᖃᑦᑕᕐᓂᐊᖅᐳᑦ ᐱᓇᔪᒃᑐᓂᒃ ᓇᓗᓇᐃᖅᓯᑎᓪᓗᒋᑦ ᐱᔪᓐᓇᖅᑎᑕᐅᔪᓂᒃ ᐊᒻᒪ ᓈᒻᒪᖅᑰᑦᑎᓗᑎᒃ ᐃᑲᔪᖅᑕᐅᔪᓐᓇᖁᓪᓗᒋᑦ.

ᐊᖏᒡᓕᒋᐊᖅᓯᒪᔪᖅ ᑲᓇᑕᒥ−ᓄᓇᕗᒻᒥ ᐃᒡᓗᒥᒃ ᓇᖕᒥᓂᖃᖅᑎᓄᑦ ᐃᑲᔫᑎᑦ ᐊᑭᖏᓐᓄᑦ ᐊᔾᔨᖃᖅᑎᑕᐅᕗᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑲᓇᑕᒥ ᓇᖕᒥᓂᖅᑖᖅᐸᓪᓕᐊᓂᖅ ᐃᒡᓗᓕᕆᔨᕐᔪᐊᒃᑯᓪᓗ ᐃᖏᕐᕋᓂᐊᖅᖢᓂᓗ 2028−ᒧᑦ ᑎᑭᓪᓗᒍ.